दिनांक : 09 जुलै 2026 | मराठवाडा प्रतिनिधी
MAHA NEWS 96 :मराठवाड्यातील नांदेड, हिंगोली आणि परभणी जिल्ह्यांमध्ये गुरुवारी (9 जुलै) पहाटे भूकंपाचे सलग धक्के जाणवल्याने नागरिकांमध्ये काही काळ भीतीचे वातावरण निर्माण झाले. अनेक नागरिक झोपेतून जागे होऊन तातडीने घराबाहेर पडले.
राष्ट्रीय भूकंप विज्ञान केंद्राच्या (NCS) प्राथमिक माहितीनुसार, पहिला धक्का पहाटे सुमारे 1:37 वाजता जाणवला. त्यानंतर पुढील दोन तासांत आणखी काही सौम्य धक्के बसले. या भूकंपाची तीव्रता विविध नोंदींनुसार 4.4 ते 4.6 रिश्टर स्केल दरम्यान होती. भूकंपाचे केंद्र हिंगोली जिल्ह्यातील परिसरात असल्याचे सांगण्यात आले आहे.
भूकंपाचे धक्के हिंगोली, परभणी आणि नांदेड शहरांसह अनेक ग्रामीण भागातही जाणवले. घरांमधील पंखे, दरवाजे, खिडक्या आणि पत्र्यांची कंपने जाणवल्याने नागरिकांनी सुरक्षिततेसाठी मोकळ्या जागेकडे धाव घेतली. काही ठिकाणी घबराटीचे वातावरण निर्माण झाले, मात्र लोकांनी संयम बाळगला.
प्रशासनाने दिलेल्या माहितीनुसार, सुदैवाने कोणतीही जीवितहानी किंवा मोठे वित्तहानीचे वृत्त समोर आलेले नाही. महसूल, आपत्ती व्यवस्थापन आणि स्थानिक प्रशासन परिस्थितीवर लक्ष ठेवून असून संवेदनशील भागांची पाहणी सुरू आहे.
जिल्हाधिकाऱ्यांनी नागरिकांना अफवांवर विश्वास न ठेवण्याचे आणि अधिकृत माहितीलाच प्राधान्य देण्याचे आवाहन केले आहे. भूकंपानंतर आफ्टरशॉकची शक्यता लक्षात घेऊन प्रशासन सतर्क असून कोणतीही आपत्कालीन परिस्थिती उद्भवल्यास त्वरित मदत उपलब्ध करून दिली जाईल, असेही सांगण्यात आले आहे.
